«Яны сталі лялькамі ў руках умелага рэжысёра». Маладзечанская раёнка дала нечаканае тлумачэнне зніжэння заробкаў на малочным камбінаце
11 мая работнікі Маладзечанскага малочнага камбіната абвясцілі страйк з-за рэзкага зніжэння заробкаў і масавых скарачэнняў. Сёння ў маладзечанскай раёнцы растлумачылі, што гэта было.
«У сераду каля дзесяці работнікаў Маладзечанскага вытворчага ўчастка ААТ «Мінскі гармалзавод нумар 1» (раней — малочны камбінат) выйшлі за прахадную, каб сустрэцца з кіраўніцтвам, — піша «Маладзечанская газета». — Тут іх чакаў мясцовы блогер. Людзі на камеру казалі: «Няма працы, няма заробку, засталося 50 супрацоўнікаў, як жыць далей? Жадаем сустрэцца з кіраўніцтвам… У гэты ж дзень сустрэча адбылася».
Паводле раёнкі, у выніку аказалася, што новая праграма пры налічэнні зарплаты дала збой. «Будзе праведзены пераразлік, і людзі атрымаюць тое, што ім належыць».
Выданне нібыта паразмаўляла з работнікамі прадпрыемства, якія выходзілі за прахадную. Ніякіх іх цытат аўтар не прыводзіць, а піша наступнае:
«Людзям сорамна. І іх можна зразумець. Яны сталі «лялькамі» у руках умелага рэжысёра».
Па версіі раёнкі, з красавіка малочны камбінат увайшоў у сталічны холдынг як вытворчы ўчастак, якім кіруе Лідзія Стаўрава. 10 траўня людзі атрымалі разліковыя лісты. Некаторыя работнікі былі здзіўленыя, што заробак у іх ніжэйшы, чым у мінулым месяцы.
Але блогеру Расціславу Чапурнову супрацоўнікі распавялі, што рэарганізацыя на прадпрыемстве адбылася ў лютым. І праблемы з заробкам пачаліся ў лютым, а не ўчора.
Супрацоўніца прадпрыемства па імені Марыя, якая ўдзельнічала ў стачцы, расказала «Медыязоне», што раней на камбінаце атрымлівалі ў сярэднім каля тысячы рублёў, а «самы мізэрны заробак быў 660». Цяпер работнікі атрымліваюць па 300—400 рублёў.
«Калі нас далучылі да Мінска ў лютым, сказалі, што заробкі меншымі не будуць. Хто вінаваты ў гэтай сітуацыі — ніхто не ведае. Мы атрымалі заробкі і не разумеем, як на іх жыць — гэта проста вельмі страшна», — расказвала супрацоўніца.
Свецкае жыццё Дар’і Шманай: дні нараджэння дзяцей Кіркорава і Comedy Club4
Каментары