Беларусы сталі есці больш морапрадуктаў і піць меней шампанскага
Больш за ўсё ў пачатку 2023 года ў Беларусі выраслі продажы морапрадуктаў. Рост амаль на 30% зафіксаваны па пазіцыі «ракападобныя, малюскі і ікраныя вырабы», піша Office Life са спасылкай на Белстат.
Ікры, малюскаў і ракападобных мы сталі есці значна больш: калі ў студзені — сакавіку 2022 года ў Беларусі прадалі амаль 1242 тоны такой прадукцыі, то ў I квартале гэтага года ўжо 1608,5 тоны. Продажы выраслі амаль на 30%. Характэрна, што разам з тым больш чым на 7% упаў продаж рыбы.
Таксама беларусы сталі купляць крыху больш, чым годам раней, мясных субпрадуктаў, сыроў, свежых агуркоў і белакачаннай капусты, а таксама яек.
Затое на траціну знізіліся продажы цукру — мінус 33% да таго ж перыяду 2022 года. Магчыма, гэта звязана з тым, што летась у сакавіку на ўнутраным рынку быў павышаны попыт на цукар, а таксама з яго рэкордным падаражэннем за апошні год.
Беларусы сталі есці менш мяса (асабліва ялавічыны), радзей куплялі мясныя кансервы і свежыя яблыкі (продажы ўпалі амаль на траціну), меншым попытам карысталіся крупы — грэчка і рыс (-28,9% і -24,5% адпаведна), мука (-25,1%), алей (-23,6%), макароны (-17,3%), сокі (-12%), бульба (-10,4%).
У 2023 годзе беларусы часцей п'юць лікёры і лікёра-гарэлачныя вырабы (іх продажы выраслі больш чым на 20%), слабаалкагольныя напоі, каньяк і брэндзі.
Пры гэтым людзі сталі радзей купляць віно (як вінаграднае, так і пладовае), гарэлку, пеністыя напоі і піва.
Цяпер чытаюць
Гэты беларус даследуе рак — вось што ён кажа пра SPF ад меланомы, навуковы прагрэс і самы складаны ў лячэнні рак3
Каментары