Аляксандр Лукашэнка раскрытыкаваў прапановы ўрада, рэалізацыя якіх можа прывесці да росту цэнаў у Беларусі. Пра гэта сёння кіраўнік дзяржавы заявіў перад тым, як заслухаць даклад аб падатковай і акцызнай палітыцы ў 2016 годзе.
Сярод прапанаваных навацый — адмена льгот па ПДВ прыкладна па 35 пазіцыях харчовых тавараў, пачынаючы ад малака, мяса і заканчваючы дзіцячым харчаваннем. Ён падкрэсліў, што такі крок прывядзе да немінучага росту цэнаў, і не факт, што мера пойдзе на карысць бюджэту. «Як упадзе попыт, тавараабарот, што і адбываецца. І якія мы дывідэнды атрымаем у бюджэт, якія мільярды зэканомім? Ды ніякіх! Проста пакрыўдзім людзей, плюнем ім у душу, і яны адвернуцца ад улады. Навошта гэта трэба?» — сказаў Аляксандр Лукашэнка.
Ён нагадаў аб дадзенай раней устаноўцы: рост цэнаў павінен кампенсавацца павелічэннем даходаў насельніцтва. «У нас жа лозунг які быў? Рост цэнаў будзе. Мы нікуды не падзенемся, мы сярод дзяржаў, дзе цэны вышэй. Таму ўсё роўна прыйдзецца падладжвацца пад іх. У адваротным выпадку будзе вымывацца тавар. Але мы тады заявілі, што рост цэнаў павінен быць спачатку кампенсаваны ростам даходаў насельніцтва», — працягнуў кіраўнік дзяржавы.
«У нас што, даходы насельніцтва ў гэты час выраслі? Не. А мы павышаем цэны», — раскрытыкаваў прапанову Аляксандр Лукашэнка. Да ўсяго, мера з адменай льгот па ПДВ можа прывесці да росту цэн на тавары для дзяцей, адбіцца на дабрабыце сацыяльна неабароненых слаёў насельніцтва.
Каментары