Новая пастанова МНС. Вешаць «вырабы з гаручага тэкстылю» на фасадах і дахах цяпер забаронена
Міністэрства па надзвычайных сітуацыях унесла змены ў Правілы пажарнай бяспекі для жылых дамоў, будынкаў і збудаванняў. Цяпер на фасадах, дахах і нават на ганку будынкаў нельга размяшчаць вырабы з гаручага тэкстылю. Новы пункт зацверджаны пастановай №39 ад 6 кастрычніка, яно апублікавана на Нацыянальным прававым партале, звяртае ўвагу Tut.by.
Цяпер не дапускаецца «размяшчаць на фасадах, дахах і (або) вонкавых паверхнях выступаючых частак будынкаў (тэраса, ганак, прыступкі і іншыя) вырабы з гаручага тэкстылю, не прадугледжаныя праектнай дакументацыяй, за выключэннем выпадкаў, устаноўленых заканадаўствам».
Гэта адно са змяненняў у Правілы пажарнай бяспекі для жылых дамоў, будынкаў і збудаванняў, размешчаных на прыдамавой тэрыторыі, садовых домікаў, гаспадарчых будынкаў і збудаванняў, размешчаных на зямельным участку, прадастаўленым для вядзення калектыўнага садаводства, дач, гаспадарчых будынкаў і збудаванняў, размешчаных на зямельным участку, прадастаўленым для дачнага будаўніцтва.
Цікава, што гэта змяненне будзе прапісана ў Правілах падпунктам 15.3 — побач з забаронай на прымяненне піратэхнікі і развядзенне вогнішчаў у памяшканнях.
Дакумент уступае ў сілу пасля афіцыйнага апублікавання.
Новаўвядзенне можа быць звязана са сцягамі, якія цяпер масава вывешваюць на дамах. У беларускім КаАП ёсць артыкул за парушэнне заканадаўства аб пажарнай бяспецы — 23.56. Санкцыі па ёй для фізасобы — папярэджанне або штраф да 30 базавых велічынь (810 рублёў).
Каментары