У чатырох грамадскіх лазнях сталіцы адкрыты хамам. Наведвальнасць некаторых з іх вырасла на 15-20%.
«Гэтыя невялікія турэцкія лазні, у якіх падтрымліваецца 100-працэнтная вільготнасць і сярэдняя тэмпература да 50 градусаў, аказаліся вельмі запатрабаваныя», — расказаў дырэктар прадпрыемства «Гарадскія лазні» Анатоль Марчанка агенцтву «Мінск-Навіны».
Першы хамам з'явіўся на пачатку 2022 года ў лазнева-аздараўленчым комплексе «Лазня» на вул. Мар'еўскай. У канцы 2022-га адкрыўся ў складзе новага спа-комплексу ў лазні № 8 на вул. В. Харужай і ў комплексе «Сухарава», а ў маі гэтага года — у «Лазні № 1» на вул. Хмяльніцкага. У прыватнасці, у двух апошніх падраздзяленнях дзякуючы новым аб'ектам наведвальнасць амаль адразу павялічылася на 15-20% — гэта адбілася на статыстыцы першага паўгоддзя.
Чаму не ствараюць турэцкія куткі і ў іншых лазнях?
«Ёсць нюансы, — адказаў на гэта Анатоль Марчанка. — Хамам мэтазгодна ўладкоўваць і для мужчын, і для жанчын, а адзінае месца ў лазні, дзе яны сыходзяцца, — гэта басейн. Яны ёсць толькі ў лазневых комплексах. Таму побач з басейнам і ствараем хамам у асобным памяшканні для агульнага наведвання. Напрыклад, лазня № 7 на вул. Маскоўскай вельмі запатрабаваная. Але ў ёй з-за адсутнасці басейна прыйшлося б ствараць два турэцкія куткі — у мужчынскім і жаночым аддзяленнях, пераабсталяваць наяўныя плошчы».
Разам з тым, у 7-й лазні восенню плануецца ўсталяваць у агульных аддзяленнях джакузі — без асобнай платы: кошт паслугі будзе ўваходзіць у кошт квітка на 2-гадзінны сеанс па аналогіі з наведваннем хамама ў лазневых комплексах, паведаміў Марчанка.
Цяпер чытаюць
Гэты беларус даследуе рак — вось што ён кажа пра SPF ад меланомы, навуковы прагрэс і самы складаны ў лячэнні рак3
Каментары