Пясок па цане пліткі: жыхар Баранавічаў ашалеў ад цэн на будаўнічы матэрыял
Беларусы абмяркоўваюць рост цэн на будматэрыялы і дзіўныя адрозненні па рэгіёнах.
Цэны на пясок у Баранавічах дасягнулі 1 000 рублёў за машыну. Сваё абурэнне жыхар Баранавічаў апублікаваў у Threads, і пост хутка сабраў дзясяткі каментарыяў ад людзей з усёй краіны, піша BGmedia.
«Пясок па цане нятаннай тратуарнай пліткі», — піша аўтар.
Паводле яго слоў, за машыну просяць каля 800 рублёў, а часам цана даходзіць і да 1000. І, як ён адзначае, нават за такія грошы яшчэ трэба знайсці пастаўшчыка.
Карыстальнікі ў каментарыях пацвярджаюць: цэны сапраўды выраслі і працягваюць расці. Некаторыя спрабуюць патлумачыць сітуацыю.
«Сам пясок каштуе нядорага. Дастаўка дарагая. Ад гэтага і пляшыце».
«Возяць з Зэльвы, у нас кар’ер закрылі».
Але большасць настроеная куды больш крытычна. Людзі пішуць наўпрост: рынак «разагналі», а цэны — «космас».
Асабліва карыстальнікаў здзіўляе розніца ў цэнах паміж рэгіёнамі.
У Баранавічах называюць 800—1000 рублёў за машыну.
У Гродне, паводле слоў каментатараў, можна знайсці за 250—300 рублёў.
У Ваўкавыску — 10 тон за 180 рублёў з дастаўкай.
У Гомелі — 30 тон за 350 рублёў.
У Мінскай вобласці — 800 рублёў за 10 тон, але ёсць прапановы і таннейшыя — 580 за 20 тон.
Такая розніца выклікае галоўнае пытанне: адкуль бяруцца такія накруткі? Некаторыя карыстальнікі ўпэўненыя, што справа не толькі ў лагістыцы.
«Тут даражэй на 30% ад нармальных цэн». «Пясок — космас. Ён не каштуе такіх грошай». «Цэмент таксама: павінен быць каля 7,5 рубля, а прадаюць па 10—11».
Людзі ўсё часцей кажуць пра тое, што іх «крыху ашукваюць», асабліва тых, хто толькі пачынае будоўлю і не арыентуецца ў рынку.
Асобная тэма — закрыццё мясцовых кар’ераў. Карыстальнікі пішуць, што з-за гэтага пясок даводзіцца вазіць з іншых рэгіёнаў, што аўтаматычна павялічвае кошт. «Кар’ер закрылі — цана адразу ўзляцела ў космас», — адзначаюць у каментарыях.
І гэта, на думку многіх, толькі пачатак. Людзі чакаюць росту цэн і на іншыя будаўнічыя матэрыялы — бетон, цэмент і сухія сумесі.
На фоне абмеркавання гучаць і заклікі да дзеянняў. Некаторыя раяць звяртацца ў МАРГ, каб праверыць абгрунтаванасць цэн. Але іншыя ставяцца да гэтага скептычна: маўляў, рынак ужо даўно жыве па сваіх правілах.
Каментары